不少人求職的時候都會海量send CV，好多時已經唔係好記得揀咗邊啲公司。誰不知突然一個hr電話打嚟，要求同你做個初步的電話面試，霎時間無乜準備、對呢間公司又無頭緒，份工咪隨時凍過水？
嗱，其實就唔係無辦法嘅，只要做足準備，自然能夠應付自如。以下是四個電話面試的必勝法︰
環境唔好太嘈
做電話面試的時候，盡量避免在地鐵站或者人流太多的地方，若然對方聽唔清你講乜，只會是不停問完又問、重覆又重覆，整個流程不順暢，留下的印象始終唔係太好。可以的話，找一處較為安靜的地方，或是cafe坐下接電話，突顯出你對面試的尊重。萬一真的一時行唔開、環境太差，亦不要硬上戰場，可嘗試向對方說明現況，並禮貌提出要求，例如十分鐘後再打電話，相信對方亦會諒解。另外，你亦要保證找的地方信號良好，方便接電。
對申請職位 / 公司唔好一無所知
明嘅，有時候投咗幾百封CV，真係唔知自己申請咗咩公司和職位。話雖如此，做電話面試之前點都要做下功課，起碼搞清楚公司係做啲咩、你份工的職責先。但萬一不好彩，你真的不記得，都千其唔好問「我申請的職位是什麼」之類的問題。當HR打來向你約時間，你應該要求對方用電郵確認面試的資料，而透過電郵就自然可以找到公司的資料。雖然香港HR打來的時候多數都會提及公司和職位，但聰明小小嘅，都應該喺send CV後記低自己申請咗咩職位、公司名同日期。
自我推銷
自我介紹是面試中的第一關，亦建構了後面過程的面試方向，對方會從中找他感興趣的內容延伸問下去，可以說自我介紹是幾乎定調了整個面試。因此，在回答中要用公司的角度講述自己的相關技能和經驗。例如你應徵的職位需要你整圖，而你又有相關經驗，就必定要着重強調這一點。就算是無任何經驗的新人，亦可以提下學校社團或是實驗經驗。在自介的過程中，重點是說服對方你符合職位所需，唔需要過於謙虛，適當吹噓一下亦是應該。
弱點變優點
hr必問的問題之一：你的弱點是什麼？ 話就話係咁問，但千萬別傻，其實他不是真的想知你有咩缺點，反而是想看你的自我反省能力和求進心。舉個例子，當你的資歷與申請職位不符合、或是欠缺某一方面的經驗的時候，第一件事就是不要講大話，如果你返工咩都唔識做、被人揭穿，相信你份工都好快玩完。你不妨坦誠告知對方，你的經驗可能不足，但強調自己十分有誠意去改進這個問題，例如你將會付出怎樣的努力、有哪方面的計劃（例如進修之類）去彌補不足。這樣做的目的，在於你把自己的不足，轉眼間變成了一個優點（謙遜、求進）呈現在他面前。
總而言之，公司無非是想利用電話訪問做一些簡單的溝通，去篩選啲人，慳返後面正式面試的時間。對求職者而言，phone interview則是見工的第一關，亦是留給對方的第一印象，做得唔好，難免提早出局，所以真係唔可以睇少，最重要是勤力做好準備。