想轉行做一啲同原本工作完全無關嘅野，以下工作所需技能可能同你一拍即合，但亦有可能睇完之後決定返去做朝九晚五，不妨睇下有咩工種啦。
1. 有條皇帝脷嘅你
所謂嘅「試味」其實各走兩極，一係超級好味，一係狗也不吃。事實上，食品公司通常會聘請品質控制員負責試味，確保每批產品保持應有質素。如果喺雪糕公司或朱古力公司有呢個職位空缺就正，連我都想申請！
有正必有反，當然亦有不太吸引、但同樣重要嘅工作，就係寵物食品試味專員。至於有無人想申請呢個職位，我就唔知道喇，不過鐘意動物嘅朋友應該好慶幸有人願意照顧埋狗仔嘅零食！
2. 鐘意Chur人嘅你
日本鐵道公司會聘請「地鐵助推員」，負責將乘客塞入繁忙車廂。車廂嘅載客量或者健康安全唔係佢地嘅首要考量（甚至無考慮過），助推員嘅職務就係負責將塞喺月台嘅乘客，夾硬推入本來就好逼迫嘅車廂度。
3. 嗅覺靈敏嘅你
坊間有份工作叫氣味辨識員，負責聞發出味道嘅物品。雖然未必係最正嘅工作，但如果你能夠忍受可怕嘅臭味，不妨考慮下。既然有錢賺，聞下口氣、格肋底、臭波鞋又算啲咩？
4. 耐性爆棚嘅你
個個都排隊，唔通個個都鐘意排隊咩？當然有錢收就唔同講法，既然有無比耐性，不如試下做專業排隊員？如果對排隊真係無興趣但又鐘意企，可以物色要真人定格演員嘅場合，著上服裝企喺櫥窗面前演出。
5. 夠Guts嘅你
原來治療毒蛇咬傷嘅解毒劑，只有一個方法可以提取，就係靠人手按摩蛇口入面嘅毒腺萃取毒液，真係無咁上下膽識都做唔到呀！自命大膽嘅你不妨試下。
6. 善於潛水嘅你
熟水性嘅你可以考慮喺高爾夫球會幫手潛水搵返啲波，或者飛去阿姆斯特丹，潛入市內運河，搜索棄置同亂放嘅單車。仲有，佛羅里達州一間水底酒店需要水底薄餅速遞員，確實係非常另類嘅送貨體驗！
7. 貪玩嘅你
坊間有數之不盡嘅型格產品，其實每項都需要不斷測試同試用先可以推出主流市場。其中受歡迎嘅有運動用品，無論係網球拍定高爾夫球棍，呢類公司都會聘請有志發展嘅團隊，負責重要嘅測試步驟，完成後先推出新嘅原型同產品。對運動無興趣？仲有水上滑梯、過山車、牀褥等，呢啲產品同用具都要經過相似嘅品質鑑定程序架。
8. 一秒變喊包嘅你
雖然講出黎都未必有人信，但亞洲有啲國家，有人自僱為哭喪女或喊口婆，喺喪禮上代哭。抗拒白事嘅朋友可以試下喺人地嘅大日子擔任職業姐妹或者兄弟，為婚禮加入魔性嘅笑聲，肯定好受歡迎。
9. 無賭不歡嘅你
係就係賭，不過係全職參加免費賭博比賽黎贏取報酬。唔少網站登廣告賺錢，用免費贏錢吸引人流，所以定期有奬金奬品俾用戶，輸左無後果，贏就攞錢或者奬品。喺限定時間入面不斷參加本地同國際賭博比賽，話唔定可以以此為生，而且你仲可能贏到一啲賭具添。
10. 癲喪嘅你
為左研究昆蟲行為，有研究人員會選擇移居到非常多蚊嘅偏遠熱帶雨林。除左每日俾蚊咬到全身幾百撻，日日被昆蟲針之餘，重要面對可能患上瘧疾嘅機會。其實，究竟要有幾討厭而家份工作先會轉行同呢啲研究員作伴？