老細唔鍾意我、被上司針對、不被主管信任......好多打工仔都會好擔心，始終上司對你的觀感及態度，好影響返工的身心健康。但萬一真係唔夾，可以點做？
職場總會遇到唔夾嘅同事，但遇着一個唔夾嘅老細，點算好？
分析形勢
如果想有得升職發圍，就唔可以當睇唔到當無事，盡快解決問題吧！老細唔妥你，首先自問有無任何地方做得不足？你平時有無遲到？老細叫你做嘢個時你有無黑面神上身？係唔係你send email成日漏咗cc佢？好可能係哩種瑣碎事，儲埋儲埋變成一肚火，一遇到導火線就燒着你！盡快搵源頭撲火啦。
萬事有商量
同上司建立一套良好嘅溝通習慣同渠道好重要。一份融洽嘅上司下屬關係唔洗擦鞋嘅，不過至少要有計傾，有意見可以開心見誠講，減少誤會。最好的安排當然是一對一會面，直接討論大家有分歧嘅地方，同時，深入溝通有助放低對大家嘅成見。有時用係公司用Skype對話，句句冷冰冰，其實可能是上司一把年紀用不慣emoji，然後你又敬對方一句無禮貌說話，沒完沒了，倒不如面對面交流。記住，走進會議室，請你忍一忍，只傾公事，唔好帶埋情緒入去。
老細心情唔好
可能你老細心情唔好、中年危機或者面對其他壓力...都唔出奇！上司再能幹都會有私人煩惱，你受靶唔代表一定係你問題。當你係哩個情況都仲可以切身處地，抱住一顆同情嘅心包容佢，佢都會感受到，話唔定會收斂下自己啲脾氣。
同老闆企同一陣線
其實會唔會係大家努力嘅方向唔同，所以有分歧？大家唔夾嘅原因，有一部分可能係上頭對你有啲期望但你唔知，而你又未表現到真正實力。一旦大家傾掂今年公司有咩大計同目標，明白咗老闆要求，就可以集中精力一齊 meet target，唔洗再畀啲人事問題纏住，做到得心應手，老闆一定會睇到你嘅價值。
搵高人指點迷津
同老闆累鬥累，不止影響工作，更會牽連私人生活的品質。如果係想你適應到佢工作模式、盡快進步等等，老闆或者都仲幫到你。當然，主動向外界求助都係一個好方法，career coach 同 life coach 等等嘅 mentor 都可以畀到建議你。有時同人傾一傾，或者會得到唔錯嘅 insight，令自己多個選擇，不再困在死胡同。
要留要走，果斷決定吧
如果你覺得有啲事係私人方面令大家無法好好合作，你可以用正式渠道向高層、HR等反映問題。但總有一啲事情無法解決，咁嘅情況下，你要準備好面對現實，究竟係妥協還是離開？所謂好來好去，或者唯一的解決方法係趁大家關係仲未破壞時抽身離開，當幫自己解脫吧。