燈光？搞掂。髮型？完美。恤衫？熨完。西褲？唔洗！
今時今日以Video（主要係Skype）進行面試越來越普遍，而且主要係作為首輪既面試比HR篩選合適既求職者進行之後既真正”面試”。
但係，千祈唔好誤以為Video interview容易！你唔單止難以觀察面試官既身體語言，收音，燈光同網絡連線等等亦容易出問題，好多事都可能出錯影響你既表現。想提升成功率？以下係7個Video Interview既必勝秘訣：
1. 設置
當你已收到面試確實時間，嘗試係準確24小時前整理你既面試設置。咁你就可以睇清楚光源調節窗簾同燈光。打開Skype檢查一下你既影像，確保背景整潔又見得人。預先檢查好網絡連線狀態係咪良好，如果唔係就坐近啲路由器。
2. 練習
請朋友做個預演，包括測試音響，坐位，對答時你既身體語言，如果有練習題目就更好！正如所有其他面試，開始時你先要介紹自己。好好練習同記熟自我介紹。面試當刻難免緊張，而對方亦可能聽得出你口窒窒。緊記一開始先向面試官打招呼同問對方聽唔聽得清楚你把聲。
3. 衣著
合適既見工衣著應該同去面對面面試一樣。辦公室工種？應該著恤衫加領帶。Startup職位？Smart t-shirt就得。
4. 寫定notes
你既面試官只係見到你一個…所以要好好利用呢個優勢！將4張便利貼貼係電腦既四角（當然唔好入鏡），寫低一啲你工作經歷，技能，成就同埋任何行業相關知識既重點係便利貼上。記住應該係好短既重點，唔係長稿俾你照稿讀。
5. 身體語言
對住電腦鏡頭講野好容易就會開始駝背。提醒自己保持坐直挺胸，咁樣有助表現你既自信。當面試進行緊，記得比面試官感受到你既親切：微笑同點頭，正如係一個日常既對話一樣。
6. 眼神接觸
「點樣聆聽」同「點樣說話」係呢部分既重點。當面試官問緊你問題，望住屏幕留意佢地既身體語言同適當點頭去顯示你係聽緊。當要回答問題：望住鏡頭！呢個時候面試官會望住屏幕睇你回答，所以你望住鏡頭先會令佢感到同你保持眼神接觸。
7. 時間管理
鏡頭對面既人士係授命要係短時間內評估你，所以記住保持你既回答精簡，只包含必要既資訊。同時記得面試最後要問問題去表現你同應徵職位同公司既興趣啊！