搵工同搵另一半一樣，初次見面一定執到最四正，到正式發展才見真章。如果對方「貨不對辦」，發現中伏，返新工辭職，如何閃人而不失霸氣？
返新工發現唔適合，返左幾日甚至即日辭職，大有人在。如果做一兩日就發現中大伏，就無謂浪費時間儘早走人，做一日辭職同做三日辭職在老闆眼中無咩分別，不要妄想留下什麼好印象，辭職程序上要做的做好就算。所以返工一日辭職，最重要是低調快走。
但如果做左幾個星期，老闆同事都記得你，就可以睇下下文，如何好黎好去。
停一停，諗一諗
不習慣新工作？人人都需要適應期，給自己一點信心、一點時間吧，你的智商又不是比在座同事低。工作性質不如預期？上了幾日training，愈來愈唔對路？立即問同事，了解清楚工作崗位的職責範圍，最好問到上一手的故事，估算自己的未來再決定。如果是其他人事問題，與上司不夾，同事不友善，公司氣氛古怪，當然趁早辭職，畢竟一份工最重要的是每日對住的人。
早啲通知
返幾日覺得唔適合大有人在，但重點係要通知而唔係悄悄地走，你不是徐志摩，別學人悄悄的走，揮一揮手，不帶走一份文件。你當然可以趁早閃人，盡快搵過份工，但要知道請人需時，如果情況許可，想好來好去，早一兩周通知，不要把HR同事弄得一頭煙，留下不負責任的印象。
開誠布公，講點解
無論是否真心挽留你，面對上司同事問到辭職原因，請大方得體地講出原因，不要以為一句「私人理由」就可以輕輕帶過。有技巧地道出你的理由，「剛開始時我的理解是這樣的職責範圍，現在了解更多，知道還包括了那些範圍，都是我不太適應的原因」。這樣一不會被人背後議論紛紛，二可以讓大家有空間討價還價，乘機重申你希望發揮和訓練的技能。成功爭取當然最好，就算沒辦法安排，上司見你另有目標，多少也可以給你一些建議，下次搵工不再容易錯配。
當面辭職，勿鬼祟whatsapp
好尷尬唔知點開口？千祈唔好怕醜或貪方便，以為上司好後生就用message講聲就可以。辭職無小事，即使份工hea你，你也認真少少，正式地當面遞信吧。除了減少文字溝通的誤解，留一個好印象更重要。曾見證過大公司的新人第一日已經no show，第二日仍無法聯絡，第三日才覆message解釋「病重」，主管心裏有數，追問是否會來報到，最後才覆「不了」。故事當然傳遍全層辦公室，連帶主人翁的校名、學系都一下子紅了。
好好交接
有人做替死鬼，拍拍籮柚走得？雖然你都只係新人，但開咗頭做落的工作，最好有交帶地交代，讓新同事輕鬆接手，你便可以漂亮地功成身退。
今日留一線，日後好相見
決定唔撈就做自己，無面畀？由上手同事遞信到你就任，公司上下話唔定花了許多人力物力先遇到你，HR都幫了你開埋MPF戶口...最後一段日子，切忌不留情面。所有的相遇，都是久別重逢，說不定將來會一起共事，所以切記保持形象。